Шерзат Полаттың әпкесі Перизат Нұрымова әлеуметтік желіде Айтым Амангелдінің сөздерін жоққа шығарып, отбасының адвокаттардан бас тартпайтынын айтты. Бұл туралы Life09 ақпарат агенттігі Stan.kz-ке сілтеме жасап хабарлайды.
Перизат Нұрымова Айтым Амангелдінің сұхбатынан кейін Қаржаубайдың сенімхатын негізге ала отырып бірнеше сұраққа жауап берді.
“Қаржаубай қорғаушылардан бас тартқан жоқ. Адвокаттардан бас тарту туралы Айтым мырзаның өзі айтты. Оған өзі түсініктеме берер. Қаржаубай Айтым мырзаның анама дөрекілік көрсетуіне және артық сөйлеуіне байланысты оған ескерту жасады. “Іс бұлай насырға шабар болса, екеуіміз келіспейтін болсақ қорғаушылармен келісімшартты бұзамын” деп ескертті. Бұл сөздерді Айтым мырзаның WhatsApp нөміріне жазды. Оны не себепті жариялағынын біз де білмейміз. Бұған Айтым мырзаны өзі жауап береді. Қорғаушылар 5 адамнан құралған деп нақты ешкімге айтқан жоқпыз. Қаржаубайдың бұрынғы адвокаттары мен қазіргі қорғаушылар істі бірге жүргізсе игі еді”, – деді Перизат Нұрымова.
Сондай-ақ, ол адвокат Саида Тәуекелова, Марал және Карина ханымға ерекше алғыс білдірді. 6 ай бойы үздіксіз жұмыс істеу оңай емес екенін атап өтті.
“Көбі жиналған ақша жайлы айтып жатыр екен. Алғашында біз адвокат таппаған кезде ақша жинаған едік. Ақша жинау 3 күнге созылды. Қорғаушылар тапқан соң оны тоқтаттық. Өзім туралы да айта кетейін. Мен халықтан жылу жинадым. Жылу жинау қазақ халқының салтында бар. Бұл “сбор” емес. Халық жинаған жылу туралы Саида ханым да, Айтым мырза да білді”, – дейді Шерзаттың әпкесі.
Сонымен қатар, белсенді Дінмұхаммед Қаматай соңғы жайттарға байланысты Айтым Амангелідінің алдағы істерге араласуы қажет емес екенін айтты.
Бұған дейін адвокат Саида Тәуекелова баспасөз мәслихатында Марқұм Шерзат Полаттың отбасы адвокаттар тобынан бас тартқаны туралы айтқан еді.