Қарағанды облысында жастармен жұмыстағы басты бағыттардың бірі – есірткіге қарсы профилактика. Мақсат – жастар арасында зиянды әдеттерге қарсы иммунитет қалыптастырып, салауатты өмір салтының құндылықтарын дарыту. Облыстың әр өңірінде білім беру және түсіндіру шаралары – кездесулер, дебаттар мен форумдар ұйымдастырылды.
Әбілқас Сағынов атындағы Қарағанды техникалық университетінде есірткімен күрес мәселелеріне арналған кездесу өтті. Іс-шараны Қарағанды қаласының жастар ресурстық орталығы мен облыстық полиция департаменті ұйымдастырды. Кездесуге студенттер, құқық қорғау органдарының өкілдері мен заң саласының сарапшылары қатысты.
Басты тақырып – синтетикалық есірткінің жаңа түрлері және олардың жастарға тигізетін қауіпті әсері болды. Спикерлер есірткіні таратудың қазіргі әдістері туралы, соның ішінде мессенджерлер мен әлеуметтік желілер арқылы жүзеге асатыны жөнінде егжей-тегжейлі баяндады. Сондай-ақ қылмыстық және әкімшілік жауапкершілік мәселелеріне, психобелсенді заттардың денсаулық пен болашақ өмірге келтіретін зиянына ерекше назар аударылды.
— Маңыздысы – жастар есірткіге тәуелділікті тек жеке трагедия емес, қылмыс ретінде де түсінуі керек, — деді полиция майоры Нұрым Сәдуақасов. — Біз студенттерге қауіпті қалай анықтау және көмекке қайда жүгіну керектігін түсіндіреміз.
Сонымен қатар интернеттегі жұмыс туралы хабарландыру түрінде жасырын жарнама беретін есірткі таратушылардың айласы да сөз болды. Студенттерге күмәнді ұсыныстарға тап болған жағдайда қандай әрекет жасау қажеттігі түсіндірілді.
Шахтинск технологиялық колледжінде өткен сыбайлас жемқорлыққа қарсы дебаттарда адалдық пен әділдік мәселелерімен қатар, есірткінің құқық бұзушылықтың бір түрі ретіндегі теріс ықпалы да талқыланды. Бұл пікірталас алаңы жастарға әлеуметтік қатерлер жайлы ашық айтуға мүмкіндік берді.
Талқылауға студенттермен бірге ішкі саясат бөлімі мен жастар ұйымдарының өкілдері де қатысты.
Бұқар жырау ауданында «Сыбайлас жемқорлықпен күрес — жастар таңдауы» атты құқықтық форум өтті. Іс-шараның негізгі мақсаты — антикоррупциялық мәдениетті қалыптастыру болса да, құқық бұзушылықтардың, соның ішінде есірткіні қолдану мен тарату мәселелері де назардан тыс қалмады.
Форумда Мемлекеттік басқару академиясының өкілдері, заңгерлер мен құқық қорғау органдарының қызметкерлері сөз сөйледі. Жастар белсенділік танытып, өзекті сұрақтарын қойды.
Іс-шара ұйымдастырушыларының айтуынша, есірткіге қарсы профилактика — бір реттік шара емес, үздіксіз жүргізілуі тиіс үдеріс. Ол ашық диалогты, сенімді және барлық тараптың белсенді қатысуын қажет етеді.
Дереккөз: Gov.kz