Бүгін астана уақытымен сағат 22:00-де отандастарымыз нижнекамскілік «Нефтехимик» клубымен өзара кім мықтыны анықтайды. Кездесуді «Qazsport» арнасының тікелей эфирінен тамашалай аласыздар.
Айта кетейік, бір апта бұрын қос команда арасындағы Астанада өткен ойында «Барыс» қарсыласын 8:0 есебімен ойсырата жеңген болатын. Бүгінгі күні бұл астаналық ұжымның лигадағы соңғы жеңісі. Сол матчтан кейін елордалық команда сырт алаңда мәскеулік «Спартакқа» 6:3, «Сибирь» клубына 4:2 есебімен есе жіберген еді. 9 ойында 7 ұпай жинаған «Барыс» турнирлік кестеде 10-шы орында.
Елордалық клубтың бұған дейін өткізген басқа да кездесулеріне көз жүгіртсек:
Барыс – Салават Юлаев (2:3);
Барыс – Сибирь (4:5);
Сибирь – Барыс (1:0);
Авангард – Барыс (4:1);
Динамо Мәскеу – Барыс (4:3);
Барыс – Адмирал (4:3).
Жалпы, отандастарымыз 9 кездесудің екеуінде жеңіске жетсе, 7 ойында қарсыластарына есе жіберген.
Осыдан кейін астаналық ұжым өз алаңында екі ойын өткізіп, қыркүйек айын қорытындылайды. Елордалық клуб 25-ші қыркүйек «Адмирал», 30-шы қыркүйек «Сибирь» командаларымен сынға түспек.
