Қазақстан құрамасы УЕФА Ұлттар лигасының 5-туры аясындағы кездесуде Беларусь құрамасын ұтты.
Қазақстандық футболшылар өз тарихында Беларусьті ешқашан жеңіп көрмеген. Ал "Астана Аренадағы" бүгінгі кездесуде Қазақстан құрамасына тек жеңіс қажет болды.
Матчтың 29-минутында Михаил Габышев Рамазан Оразовтың әдемі пасын голға айналдырды. Бірақ командалар үзіліске кетер сәтте Павел Савицкий стандарт кезінде баспен дәл соққы жасап, есепті теңестірді.
Матчтың 79-минутында Бахтияр Зайнутдинов гол соғып, барша қазақстандықты қуантты. Қорытынды есеп - 2:1.
Осы жеңістен кейін Қазақстан құрамасы Ұлттар лигасының тобында бірінші орын алып, В дивизионына жолдама алды. Одан бөлек, ЕУРО-2024 жолдамасына таласады. Онда Ұлттар лигасы С дивизионындағы әр топта бірінші орын алған төрт команда бір жолдамаға таласады.
