Бүгін, 23 маусым – Қазақстан полициясы күні. Бұл атаулы күн – өз өмірлерін қоғамдық қауіпсіздікті қамтамасыз етуге, заң үстемдігін нығайтуға және азаматтардың құқықтарын қорғауға арнаған жандардың кәсіби мерекесі.
1992 жылы дәл осы күні Жоғарғы Кеңес «Қазақстан Республикасының ішкі істер органдары туралы» Заңды қабылдаған болатын. Содан бері бұл күн тәртіп сақшыларының қажырлы еңбегі мен кәсібилігіне құрмет көрсетудің символына айналды.
Қазіргі таңда ішкі істер органдарының қызметкерлері заманауи сын-қатерлермен күресе отырып, елдегі тұрақтылықты сақтау жолында күндіз-түні қызмет етуде. Әсіресе, бұқаралық шараларда қоғамдық тәртіпті күзету, қылмыстың алдын алу және жол қауіпсіздігін қамтамасыз ету бағытында полиция қызметкерлеріне артылатын жауапкершілік жүгі салмақты.
Мереке аясында еліміздің түкпір-түкпірінде қызметтік міндетін мінсіз атқарған үздік қызметкерлер марапатталып, қызмет бабында ерлікпен қаза тапқан батырлардың рухына тағзым етілуде.
«Life09» ақпарат агенттігі барша ішкі істер органдарының қызметкерлерін кәсіби мерекелерімен құттықтайды! Ел игілігі жолындағы қиын да жауапты қызметтеріңізге сәттілік, отбасыларыңызға амандық пен бақ-береке тілейміз!