Бүгін, 23 маусым – елімізде Мемлекеттік қызметші күні атап өтілуде. Бұл кәсіби мереке – мемлекеттік басқару жүйесін дамытуға, халыққа сапалы қызмет көрсетуге және ел игілігі жолындағы реформаларды жүзеге асыруға атсалысып жүрген мамандардың еңбегін айшықтайды.
Қазақстанда бұл күн Біріккен Ұлттар Ұйымының (БҰҰ) Мемлекеттік қызмет күнімен тұспа-тұс келеді. Ол ел Президентінің Жарлығымен ресми кәсіби мерекелер тізіміне енгізілген болатын. Мерекенің басты мақсаты – мемлекеттік аппарат қызметкерлерінің жауапкершілігін арттыру, олардың қоғам алдындағы еңбегін бағалау және жас мамандарды осы салаға тарту.
Бүгінгі таңда елімізде «Халық үніне құлақ асатын мемлекет» тұжырымдамасы аясында мемлекеттік қызметтің ашықтығы, кәсібилігі мен сервистік форматына ерекше мән берілуде. Аудандық, облыстық деңгейден бастап орталық органдарға дейінгі әрбір қызметкер азаматтардың әл-ауқатын арттыру және заң талаптарының мүлтіксіз орындалуы жолында аянбай еңбек етіп келеді.
Мереке қарсаңында өңірлерде және елордада қызметтік міндеттерін мінсіз атқарып, ел дамуына елеулі үлес қосқан мемлекеттік қызметшілер арнайы төсбелгілермен, алғыс хаттармен марапатталуда.
«Life09» ақпарат агенттігі барша мемлекеттік қызмет саласының өкілдерін кәсіби мерекесімен құттықтайды! Жауапты да күрделі жұмыстарыңызға табыс, кәсіби өсу және ел мүддесі жолындағы бастамаларыңызға сәттілік тілейміз!