Президент Қарағанды облысының әкімі Жеңіс Қасымбекті, Шығыс Қазақстан облысының әкімі Даниал Ахметовті, Алматы облысының әкімі Қанат Бозымбаевты, Жамбыл облысының әкімі Бердібек Сапарбаевты, Шымкент қаласының әкімі Мұрат Әйтеновті, Қостанай облысының әкімі Архимед Мұхамбетовті, Ақтөбе облысының әкімі Оңдасын Оразалинді және Ақмола облысының әкімі Ермек Маржықпаевты қабылдады.
Президентке аймақтарда былтыр атқарылған жұмыстар мен 2022 жылдың алғашқы екі айындағы даму көрсеткіші туралы баяндалды.
Әкімдер мемлекет басшысының берген тапсырмаларының орындалу барысы жөнінде мәлімет берді.
"Президент халықпен жиі кездесудің, қоғамдық қабылдауларды тұрақты өткізудің маңыздылығын атап өтіп, өңірлердің басшыларына тұрғындарды мазалаған мәселелерді уақтылы шешу қажет екенін айтты", - делінген ақпаратта.
Қасым-Жомарт Тоқаев көктемгі егіс науқанына дайындық жұмыстарын күшейтуді және өңірлерде жүзеге асырылып жатқан жобаларды жалғастыруды тапсырды.
