Қарағанды облысында сатып алушылар қандай ет сатып алып жатқанын өз бетінше біле алады. Ол үшін сатушыдан жануар туралы барлық мәліметтер орналастырылған QR коды бар ветеринарлық қызмет актісін талап ету керек.
Сөреге жеткізілмес бұрын ет мұқият ветеринарлық-санитарлық тексеруден өтеді. Ветеринарлық қызметте QR-код қолданатын пилоттық жоба туралы айтылды.
- Біздің міндетімізге ішкі сауда объектілеріне келіп түсетін барлық өнімдерді бақылау және қадағалау кіреді. Тұтас малдың етін бізге көлікпен алып келеді, біз ветеринарлық құжатты тексереміз. Әрі қарай, ветеринарлық сараптамаға жібереміз, ол осы жерде, зертханада жүргізіледі. Тек содан кейін ғана ветеринарлық санитарлық акт беріліп, ет дүкенге түседі, - деп түсіндірді Қарағанды ветеринариялық инспекциясының бас маманы Жасқанат Сейдахметов. - Сатып алушының сатушыдан ветеринарлық-санитарлық сараптама актісін талап етуге құқығы бар. QR код арқылы ол жануар туралы барлық мағлұматты білуге болады – туылғаннан бастап оны сөреге жеткізгенде дейін. Атап айтқанда, оның қожайыны кім болды, жануар қандай вакциналар алды, оны қалай сойды және т. б.
Облыс бойынша эпизоотиялық жағдай тұрақты. Жыл басынан бері қауіпті аурулардың сегіз түріне қарсы жануарларға вакцина егілді. 2,1 млн екпе жасалды. Сондай-ақ, ветеринарлар аурудың 10 түрі бойынша 400 мың диагностикалық зерттеулер жүргізді.
Ветеринария басқармасының бөлім басшысы Амандық Жақетаевтың айтуынша, бруцеллезге 1,3 млн-нан астам ірі қара мен ұсақ малды зерттеу жоспарланған. Бұл жұмысты ветеринарлық қызмет мамандары жүргізеді.
Ауру жануарлар анықталған жағдайда олар арнайы объектілерде 15 күн ішінде санитарлық ережеге сай сойылады. Малды тапсырған иелеріне өтемақы төленеді: 30% жергілікті бюджет есебінен, 70% - ууру жануарларды алып кететін өңдеу кәсіпорны есебінен, ал ет консервілер мен шұжық жасауға жіберіледі. Мамандар аурудың қоздырғышы - бруцелла - термиялық өңдеу кезінде өлетінін еске салады.
Қарағанды облысында моноқалаларда төрт филиалы бар 9 ветеринарлық станция жұмыс істейді.
