Талдықорғанда кәмелетке толмағандарды бейімдеу орталығында күйік алған жеткіншек отбасына оралды,деп хабарлайды LIFE09 ақпараттық агенттігі Sputnik.kz-ке сілтеме жасап.
Жеткіншек қазір апасы мен әкесінің қасында, отбасына оралған.
Баланы бейімдеу орталығында үтікпен күйдірді деген ақпаратты ести салып балалар жедел уәкілі оқиға орнына жеткен.
"17 тамыз күні мәселені анықтау үшін Жетісу облысындағы кәмелетке толмағандардың құқы бойынша өкілетті уәкіл ретінде Талдықорған қаласындағы кәмелетке толмағандарды бейімдеу орталығына барып, орталықтың қызметкерлерімен сөйлестім. Зардап шекті деген жас бала бұл бейімдеу орталығында өзінің әпкесімен бір ай уақыт болған", - дейді балалар құқы жөніндегі жедел уәкіл Ермек Егінбаев.
Оның айтуынша, балалардың анасы жақында қайтыс болған. Анасының қайтыс болуына байланысты тиісті құжаттарды қорғаншылық ұйымдары рәсімдеп, жас балалар өз апасына табысталған.
Балалардың әжесі Екатерина Полянина баланың қазіргі көңіл-күйі жақсы екенін айтты.
"Мен жұмыстамын, әкесі Роман да жұмыста, ал балалар үйде. Немеремнің жағдайы, көңіл-күйі жақсы. Жарасы жазылғанымен, үтіктің іздері әлі де бар", - дейді Екатерина Павловна.
Облыстық полиция департаментінің мәліметінше, тергеу әлі жүріп жатыр.
"Жетісу облыстық полиция департаментіне Талдықорған қаласының кәмелетке толмағандарды бейімдеу орталығында қатыгездік көрсетудің ықтимал фактісі туралы хабарлама келіп түсті. Өтініш берушінің айтуынша, 7 жасар баланың денесінде мекеме қызметкерлерінің зорлық-зомбылық әрекеттері нәтижесінде пайда болған күйіктер анықталған", - дейді полиция.
Ведомство қылмыстық іс қозғаған.
"Бұл факт бойынша қылмыстық іс қозғалды және мұқият тергеу басталды. Бастапқы тергеу іс-шаралары жүргізілді, оның барысында орталық қызметкерлерінен түсініктемелер алынды. Мекеме басшылығы баланың күйіп қалуына себеп болған оқиға 24 шілдеде болғанын және жазатайым оқиға екенін айтты", - дейді полиция.
Алайда, айыптаулардың ауырлығын ескере отырып, полиция департаменті қосымша сараптамаларды, соның ішінде сот-медициналық сараптаманы жасап жатыр.
"Орталықтың қызметкерлері мен тәрбиеленушілерін қоса алғанда, куәгерлер арасында сауалнама жүргізіледі. Полиция балалардың қауіпсіздігіне қатысты барлық фактілерге ерекше назар аударады және осы оқиғаны жан-жақты тергеуді жалғастыруда", - дейді облыстық полиция департаменті.
