Кәсіби мереке қарсаңында Қарағанды облысында айналасына көмек көрсету жай ғана жұмыс емес, өмірлік ұстанымы болып табылатын әлеуметтік қызметкерлерді құттықтады.
Өңірде көмекке мұқтаж жандарды қолдау үшін көп жұмыс атқарылуда. Әлеуметтік қызметтерді 100-ден астам мекеме көрсетеді, көпбалалы және аз қамтылған отбасыларды қолдайтын 10 орталық жұмыс істейді. Төрт өңірде Ten Qogam әлеуметтік бейімдеу орталықтары ашылды.
– 72 арнайы әлеуметтік қызмет көрсету орталықтарында тоғыз мыңға жуық адам көмек алуда. Облыстың барлық аудандарында "Инватакси" сервисі жұмыс істейді. Мүгедектер арбасын жөндеу бойынша жаңа жоба жүзеге асырылуда. Психикалық ауытқулары бар балалар шипажай-курорттық ем ала алады, – деп атап өтті Ермағанбет Бөлекпаев. – Құрметті әлеуметтік қорғау жүйесінің қызметкерлері, Сіздердің еңбектеріңізді сандармен немесе көрсеткіштермен өлшеу мүмкін емес. Адамдар үшін істеп жатқан жақсылықтарыңызға баға жетпейді. Сіздерге рахмет айтамыз!
Мерекеде кәсіби байқаудың қорытындысы шығарылды. Әлеуметтік саланың үздік қызметкерлеріне сыйлықтар, дипломдар мен мүсіншелер табыс етілді.
Балқаштан келген әлеуметтік қызметкер Мереке Кәрімова "Үздік әлеуметтік қызметші" номинациясының жеңімпазы атанды, ол өмірінің 27 жылын осы асыл мамандыққа арнаған.
– Мен бұл мамандыққа кездейсоқ түстім, бірақ қазір бұл менің өмірлік ықыласым екенін түсіндім, – дейді Мереке Кәрімова. – 2003 жылдан бастап мүмкіндігі шектеулі балалармен жұмыс істеймін. Нәтиже көргенде ерекше қуанамын. Мен жұмысымды жан-тәніммен беріліп істеймін, өйткені мен балаларды қатты жақсы көремін.
Бұқар Жырау ауданының жұмыспен қамту және әлеуметтік бағдарламалар бөлімінің ардагерлермен және мүгедектермен жұмыс секторының бас маманы Оксана Есенбекова "Жұмыспен қамту және әлеуметтік бағдарламалар бөлімінің үздік қызметкері" номинациясының лауреаты атанды.
– Менің басты міндетім – бізге көмек сұрап келген адамдармен жұмыс істеу. Біз қамқорлық, назар, сезімталдық танытуымыз керек. Адам кетіп бара жатқанда, "рахмет" десе, бұл менің жұмысым үшін ең жақсы сыйлық. Маған мамандығым өте ұнайды, мен оған 17 жылымды арнадым. Бүгінгі марапат – бұл жақсы жұмыс істеуге және адамдарға жақсылық әкелуге ынталандыру, – дейді Оксана Есенбекова.
"Мамандыққа адалдығы үшін" бас номинациясына Абай ауданының әлеуметтік қызметкері Айгүл Сейфуллина ие болды. Әлеуметтік қорғауда ол 22 жылдан астам жұмыс істеген. Ол тек өз ісінің маманы ғана емес, сонымен бірге жүрегі кең адам.
Сыйлықтар әлеуметтік сала ардагерлеріне де берілді, олардың күш-жігері мен тәжірибесі жас ұрпақ үшін құнды болып қала береді.
Сондай-ақ, мемлекеттік қолдаудың арқасында өз ісін аша алған грант алушылардың өнімдерінің көрмесі ұйымдастырылды.
Қазақстанда әлеуметтік қорғау жүйесі қызметкерлерінің күні қазан айының соңғы жексенбісінде атап өтіледі.
