Қарағанды облысында мүмкіндігі шектеулі балалар мемлекеттік білім беру тапсырысының арқасында тегін психологиялық-педагогикалық қызметтер алады.
Марина Русанованың егіздеріне мидың органикалық зақымдануы диагнозы қойылған. Оларға Balpan түзету және дамыту орталығындағы сабақтар көмектеседі.
– Біз Balpan-ға екінші жыл қатарынан келіп жүрміз, мен керемет нәтижелерді байқаймын. Егер бұрын олар далаға тыныш шыға алмаса, қазір бәрі өзгерді. Балалар сабырлы, оқуды оңай меңгереді, әлеуметтік дағдыларды қалыптастыра бастады. Биыл сабақтар біз үшін тегін болды, бұл қаржылық жағынан айтарлықтай көмектеседі, өйткені инклюзивті білім қымбат, – дейді Марина Русанова.
Бүгінгі таңда Қарағанды облысында ерекше білім беру қажеттіліктері бар 18 мыңнан астам бала тұрады. Олар үшін 30 арнайы ұйым жұмыс істейді. Қазір балаларды арнайы психологиялық-педагогикалық қолдаумен және ерте түзетумен қамту 85% құрайды.
Биыл алғаш рет Қарағанды өңірінде мүмкіндігі шектеулі балаларды психологиялық-педагогикалық қолдауға мемлекеттік білім беру тапсырысы іске асырылуда.
Қосымша тегін көмек туғаннан бастап 18 жасқа дейінгі 300 баланы қамтыды. Курстың ұзақтығы жылына 90-нан 270 күнге дейін созылады.
– Биыл психологиялық-педагогикалық қолдау бойынша мемлекеттік тапсырыс Қарағандының екі жеке ұйымында және екеуі Теміртауда жүзеге асырылды. Орталықтар мұқият, конкурстық негізде таңдалды. Балалар ол мекемелерге ПМПК шешімі бойынша жолданды, – деп түсіндірді білім басқармасының мектепке дейінгі тәрбие, жалпы орта және арнайы білім беру бөлімінің басшысы Гүлдана Нұрсұлтан.
Мемлекеттік тапсырысты орындайтын ұйымдардың бірі Balpan түзету-дамыту орталығы болды. Мұнда дефектологтар, логопедтер, психологтар жұмыс істейді. Мамандар заманауи оқыту және түзету әдістерін қолданады, соның ішінде Монтессори жүйесі, ABA және арт-терапия, ROS және т.б. Барлық қажетті жабдықтар бар.
– Осы жылдың 15 сәуірінен бастап біз 150 ерекше баламен мемлекеттік тапсырыс бойынша жұмыс істейміз. Алдымен көптеген балаларға сапалы қызмет көрсете алатынымызға күмән туды, бірақ біздің педагогтардың тәжірибесі мен біліктілігінің арқасында барлығы мүмкін болды, – дейді Balpan орталығының директоры Маржан Тұрлұбекова. – Балалар әртүрлі жағдаймен келді. Әрқайсысына жеке жоспар жасалды. Тоғыз ай жұмыс істегеннен кейін біз айтарлықтай жақсарғанын көрудеміз. Бұрын тек жеке дыбыстарды айта алатын балалар енді сөздерді айта бастады, ал кейбіреулері толықтай сөйлемдерді құрастырады. Біз сондай-ақ өзіне-өзі қызмет көрсету дағдыларын және басқа да маңызды дағдыларды дамытуға көмектесеміз. Ата-ананың көмегінсіз прогресс болмайды. Егер олар біздің барлық бастамаларымызды қолдайтын болса, онда нәтижелер орасан зор.
Мемлекеттік тапсырысты іске асырудың әлеуметтік әсері де бар. Бос уақыттары болғандықтан 10-ға жуық ата-ана жұмысқа орналасты. Ал 27 отбасы балаларына түзету-дамыту сабақтарын төлеу үшін ай сайынғы несие алуды тоқтатты.
Келесі жылы білім басқармасы мемлекеттік тапсырысты іске асыруды жалғастырады. Бағдарламаға кем дегенде 300 бала қосылады деп күтілуде. Сондай-ақ, жыл соңына дейін Қарағандыда ПМПК және Балқашта психологиялық-педагогикалық түзету кабинеті ашылады.
