Қарағандыда жол қауіпсіздігін арттырудың жаңа тәсілі енгізілді. Енді ескерту және тыйым салатын белгілері асфальт бетіне де салынады.
Қала әкімдігінде түсіндіргендей, бұл белгілер термопластикпен салынады және жүргізушілердің шектеулерге дер кезінде назар аударуына көмектеседі. Әсіресе апат жиі болатын немесе көріну қиындаған учаскелерде осындай белгілер қолданылады.
Алғашқы болып мұндай белгілер Аманжолов көшесінде пайда болды. Мұнда асфальтқа «Абайлаңыз, балалар» және «Жылдамдықты 40 км/сағ дейін шектеу» белгілері салынған. Мамандардың айтуынша, бұл таңдау кездейсоқ емес: жүргізушілер бұл бөлікте жиі жылдамдықты асырады, ал көше бойында реттелмейтін жаяу жүргіншілер өткелдері көп орналасқан. Мұндай жағдайда жаяу жүргіншіні қағып кету қаупі артады, ал қосымша ескерту апаттардың алдын алуға ықпал етуі тиіс.
Атап өту керек, жол белгілері мен жол жабындысындағы жолақтар мен таңбалардың дұрыстығы «Жол активтері ұлттық сапасының орталығы» мамандарының назарында.
