Конституцияның 30 жылдығы қарсаңында Бұқар жырау ауданына қарасты Ескі Тұзды ауылының тұрғындары таза ауыз суға қол жеткізді. Мұнда су тазартудың модульді блогы іске қосылды.
Ескі Тұзды ауылында 22 отбасы тұрады. Жаңа қондырғының арқасында олар енді сүзгіден өткен, тазартылған ауыз суын тұтына алады.
— Біздің шағын ауылымыз ұзақ уақыт бойы үш құдықтан су ішіп келді, олардың сапасы әртүрлі, кейде тіпті талапқа сай емес болатын. Енді 100 метрлік құдық қазылды. Мамандардың айтуынша, су бірнеше кезеңнен тазартудан өтеді және барлық сапа талаптарына сәйкес келеді. Шынымен таза әрі дәмді су. Біз қатты қуаныштымыз, мұндай жақсы өзгерістер жалғаса береді деп сенеміз, — дейді Ескі Тұзды ауылының тұрғыны Тамара Туравинина.
Волковское және Стан ауылдарында да іске қосылды.
— Көптеген отбасылар үшін бұл үлкен жеңілдік. Бұрын суды бөтелкемен сатып алуға немесе көрші ауылдарға баруға тура келетін. Бұл — уақыт пен шығын. Енді ауылымыздың өзінде таза су аламыз. Осы игі іске атсалысқандардың бәріне алғыс айтамыз! — деді Волковское ауылының тұрғыны Людмила Пискунова.
Осылайша, Бұқар жырау ауданындағы 68 елді мекеннің 65-інде, яғни 99 пайыздан астам тұрғын таза ауыз сумен қамтамасыз етілді. Жақын арада қалған Жаңаауыл, Первое Мая және Севан ауылдары да сапалы ауыз суға қол жеткізетін болады.
Мәселен, Первое Мая ауылында мердігер 55 құдық қазып, орнатты, 2,5 шақырым су құбыры желісін тартты және су жүйелерін монтаждауға кірісті. Ауылдағы барлық үйлер магистральды су құбырынан ауыз су алады.
Севан ауылында мердігер ұйым құдық қазып, модульді су тазарту блогын орнатуға арналған контейнер мен сүзгі-помпа жабдығын дайындап жатыр.
Ал Жаңаауыл ауылында құбырлар, фланецтер және басқа да материалдар сатып алынды, 1,7 шақырым су құбыры тартылды, қосымша құдық қазылып, су мұнарасы тұрғызылды. Жалпы, ауылда ұзындығы 3 шақырым су желісі жүргізіліп, сыйымдылығы 25 текше метрлік су мұнарасы орнатылады.
Жақын уақытта Бұқар жырау ауданының халқы 100 пайыз таза ауыз сумен қамтылатын болады.
Бұқар жырау ауданы әкімдігінің ақпараты бойынша
