26 мамырда Алматыда қоғамдық денсаулық сақтау саласының көрнекті қайраткері Төрегелді Шармановпен қоштасу рәсімі өтті. Академик 25 мамырда дүниеден өтті. Бұл туралы Денсаулық сақтау министрлігіне сілтеме жасап Life09 ақпарат агенттігі хабарлайды.
Президенттің тапсырмасы бойынша белгілі мемлекет және қоғам қайраткері, академик Төрегелді Шармановпен ресми қоштасу рәсіміне парламент мәжілісінің төрағасы қатысты. Ерлан Қошанов мемлекет басшысының көңіл айту хатын оқыды:
"Бүкіл өмірін ұлт денсаулығына арнаған Төрегелді Шарманұлы бірегей тұлға болды. Ол бар күшін отандық медицинаның дамуына арнады, көптеген пайдалы және жақсы бастамалардың басында болды. Оның қызметінің арқасында Қазақстанда тағамтану туралы ғылымның көкжиегі едәуір кеңейтілді, Дүниежүзілік денсаулық сақтау ұйымымен, ЮНИСЕФ-пен және басқа да халықаралық құрылымдармен ынтымақтастық жолға қойылды. Ол жаңа ғылыми мектеп құрып, көптеген оқушыларды тәрбиеледі. Төрегелді Шарманұлының жарқын бейнесі халқымыздың есінде мәңгі сақталады", - делінген президенттің көңіл айту хатында.
Премьер-министрдің орынбасары Тамара Дүйсенова премьер-министр Олжас Бектеновтың атынан көңіл айтты. Қоштасу рәсімі барысында академик Төрегелді Шармановтың рөлі мен еңбегі туралы Алматы қаласының әкімі Ерболат Досаев пен Президент жанындағы Ұлттық ғылым академиясының президенті Ақылбек Күрішбаев айтты.
"Төрегелді Шарманұлы – тек Қазақстанның ғана емес, бүкіл әлем медицинасының нағыз аңызы мен мақтанышы. Атақты Алматы декларациясының қабылдануы жаһандық денсаулық сақтау жүйесін дамытудың бастапқы нүктесі болды. Қазақстан бүкіл әлемде халыққа дамыған медициналық-санитариялық алғашқы көмек көрсететін ел ретінде танылды. Төрегелді Шарманұлының есімі біздің медицина тарихымызға алтын әріптермен жазылған. Еліміздің медицина жұртшылығы, біздің ғалымдарымыз, әріптестеріміз, студенттеріміз және отандастарымыз денсаулық сақтау көшбасшысының жарқын бейнесін, оның бірегей адами қасиеттерін, қоғам алдындағы орасан зор еңбегін әрқашан есінде сақтайтын болады", - деді денсаулық сақтау министрі Ақмарал Әлназарова қоштасу рәсімінде.
Академик Шармановпен қоштасуға көптеген мемлекет және қоғам қайраткері, депутаттар, саясаткерлер, ғылыми қоғамдастық, денсаулық сақтау және басқа да салалардың өкілдері келді.
