Қарағанды облысында биыл алғаш рет чипс сұрыпты картоп өсірілді. 2026 жылы Алматы облысында Lay's чипстерін шығаратын зауытты іске қосуды жоспарлап отырған PepsiСo компаниясы жергілікті шикізат жеткізушілерін таңдау үшін Қазақстанның бірнеше ауыл шаруашылығы кәсіпорындарымен ынтымақтастықты бастады. Солардың бірі – Осакаров ауданы Ақпан ауылындағы "Найдоровское" ЖШС.

Шаруашылық директоры Павел Лущактың айтуынша, чипс сұрыпты картоп 80 гектар сынақ учаскесінде өсірілді. Егуге арналған арнайы сұрыпты компания ұсынды.

– Бізге сенім артылды. Биыл біз шамамен бір жарым-екі мың тонна жинап, сынақ режимінде қайта өңдеуге жібереміз. 2025 жылы да осылай болады. Ал Алматы облысында зауыт ашылған кезде, егер біз барлық сапа стандарттарына сай келсек, жеткізу көлемін арттырамыз, – дейді Павел Лущак. – Ынтымақтастық өте қызықты. Өнеркәсіптік өңдеуге арналған картоп – бұл асханадан басқа деңгей. Және бұл сатылымды кепілдендіру болып табылады. Фермерлер үшін өте жақсы әлеует.

Оның айтуынша, мұндай серіктестікке бірнеше жылдан бері қадам жасалып келеді. Алғашқы байланыс сегіз жыл бұрын компания елдің нарығы мен қажеттіліктерін зерттеген кезде орнаған.

Компания чипстер өндіру үшін өсірілген картопты сатып алып қана қоймайды, сонымен қатар заманауи егіншілік технологияларын енгізуге көмектеседі.

Тәжірибелі мамандар отырғызудан бастап барлық кезеңдерді сүйемелдейді. Соның ішінде суару, өсімдіктерді қорғау бойынша кеңес беріледі.

– Өз нюанстары бар, бәрін үйренеміз, тәжірибе аламыз. Бұл үлкен пайда, өйткені біз технологияны барлық алқаптарда қолданатын боламыз, – дейді Павел Лущак. – Өнеркәсіптік өңдеуге арналған картопқа қойылатын талаптар қатаң, құрамда қант пен құрғақ заттардың қажетті көлпмде болуын қадағалау керек. Сақтау ерекшелігі бар.

"Найдоровское" ЖШС келесі жылы 25 жылдық мерейтойын атап өтеді. Ширек ғасырда шаруашылық үлкен даму жолынан өтті. Бүгінде ол 200-ден астам адамды жұмыспен қамтамасыз етеді. Дәнді, майлы дақылдарды, бұршақ дақылдарын және картопты өсіруге маманданған.

Олар картоппен 10 жыл бұрын айналыса бастады. Ол кезде алқаптар небәрі 70 га болатын, ал қазір 480 га дейін кеңейді. Өндіріс 20 мың тоннаға дейін өсті. Олар картоп сақтайтын үлкен қойма салды, келесі жылы тағы бір қойма салуды жоспарлап отыр. Кеңейтуден кейін шаруашылық 50 мың тоннаға дейін картоп өсіре алады. Қазір ол өз өнімдерімен елдің ішкі нарығын қаматып отыр, ал алдағы уақытта Еуропаға шығуды жоспарлап отыр.

Биыл ауа-райына байланысты егін жинау әдеттегіден кешірек, тамыз айының соңында басталды. Жалпы 57 мың тоннаға жуық өнім жинау жоспарлануда: астық – 35 мың тонна, картоп – 20 мың тонна және екі мың тонна зығыр.