Қарағанды облысындаберілген әлеуметтік тұрғын үйді пайдалануға қатысты тұрғындардың шағымдарына жауап беріледі. Өңір басшысы Ермағанбет Бөлекпаев барлық қалалар мен аудандарда тексеру жүргізуді тапсырды.
– Тұрғындармен барлық кездесулерде тұрғын үй, кезектілік мәселелері көтеріледі. Ол пәтерлерде кезекпен үй алғандар емес, жалға алған адамдар тұратындығы туралы айтады. Барлық қалалар мен аудандардың әкімдіктеріне тұрғын үй инспекциясымен бірге қайта тексеруді тапсырамын. Толық талдау жасау керек, – деді облыс әкімі аппараттық кеңесте.
Тұрғын үй құрылысының барысы туралы құрылыс, сәулет және қала құрылысы басқармасының басшысы Мұрат Мағзин баяндады.
2024 жылға облыс бойынша барлық қаржыландыру көздері есебінен 500 мың шаршы метр тұрғын үй немесе 4 299 пәтер енгізу жоспарланған. Өткен жылмен салыстырғанда өсім 18,2% құрайды.
Есепті деректер бойынша 8 айда 331 мың шаршы метр тұрғын үй салынды.
Несиелік және жалға берілетін тұрғын үйлердің құрылысы жалғасуда. Сонымен қатар, жеке құрылыс салушылардан жалға берілетін тұрғын үй сатып алынады. Жалпы биыл әлеуметтік осал санаттағы кезекте тұрғандарға 1733 пәтер беру жоспарлануда.
