Теміртауда “Қазақстан халқына” қорының қолдауымен салынған 30 жаңа заманауи спорт алаңы ел игілігіне берілді. Ашылу салтанатына ҚР Парламенті Мәжілісінің депутаттары, қала басшылығы, Қарағанды облысы әкімінің орынбасары Әлібек Әлденей, сондай-ақ, қордың Қамқоршылық кеңесі мен серіктестер қатысты.
Алаңдар балалар мен жастардың бұқаралық спортпен айналысуына мүмкіндік жасау мақсатында салынған. Жоба аясында әр алаңға арнайы резеңке төсеніш, футбол, баскетбол және волейбол ойнауға арналған әмбебап алаң, воркаут аймақтары және жарықтандыру жүйесі орнатылды.
Іс-шара барысында облыс әкімінің орынбасары Әлібек Әлденей тұрғындарды құттықтап, мұндай жобалар өңірдегі спорт инфрақұрылымын дамытуға айтарлықтай үлес қосатынын атап өтті.
“Қазақстан халқына” қоры өкілдері Теміртау қаласында жүзеге асқан жоба алдағы уақытта да жалғасын табатынын жеткізді.
Жаңа спорт алаңдары қала тұрғындарының салауатты өмір салтын ұстануына, балалардың бос уақытын тиімді өткізуіне және бұқаралық спортты дамытуға серпін береді.
Автор: Жан Тілеуқұлұлы
