Қызылорда қаласындағы «Арай» саябағында орын алған төтенше жағдайға байланысты жаңа деректер белгілі болды. Қызметкердің өміріне қауіп төндірген аттракционның ресми тіркеуден өтпегені анықталды, деп хабарлайды Life09 ақпарат агенттігі Stan.kz-ке сілтеме жасап. Қалалық тұрғын үй-коммуналдық шаруашылығы бөлімінің мәліметінше, нысан иелері тарапынан құрылғыны есепке қою туралы ешқандай өтініш түспеген. Құзырлы органдардың жаңа аттракциондарды заңдастыру қажеттігі туралы алдын ала жасаған бірнеше ескертуі еленбеген.
Қайғылы жағдай салдарынан ойын құрылғысының механизмі 19 жастағы оператордың аяқтарын қысып қалған. Алған ауыр жарақаттарына байланысты дәрігерлер науқастың аяқтарын ампутациялауға мәжбүр болды.
Қазіргі уақытта еңбек қауіпсіздігі ережелерін бұзу фактісі бойынша тергеу амалдары жүргізіліп жатыр. Істің ақ-қарасы анықталғанға дейін саябақтағы барлық аттракциондардың қызметі уақытша тоқтатылды.
Қызылордадағы аттракционда болған қайғылы оқиға: техникалық құрылғы рұқсатсыз іске қосылған
Фото: Gemini ИИ
