Қарағанды облысында су тасқынының алдын алу басқа аймақтармен салыстырғанда жоғары деңгейде ұйымдастырылғаны айтылды. Бұл туралы Су тасқынына қарсы іс-шараларды үйлестіру жөніндегі республикалық штабта баяндалды, деп хабарлайды Life09 ақпарат агенттігі.
Ақтөбе облысында Қазақстан премьер-министрі Олжас Бектеновтың төрағалығымен селектор режимінде өңірлік штаб басшыларының қатысуымен су тасқынына қарсы іс-шараларды үйлестіру және су тасқыны салдарын жою жөніндегі республикалық штабтың отырысы өтті.
Сондай-ақ, штаб отырысында бұрын қажетті шаралар қабылданған аймақтар бар екендігі, сондықтан су тасқынының салдары соншалықты жойқын болмағаны атап өтілді. Мәселен, Қарағанды облысында судың едәуір көлеміне қарамастан, елдімекендерді су басу аз. Себебі, 6-7 жыл бұрын ауылдардың айналасында бөгеттер салынып, бұрылатын каналдар қазылған. Бұл қарапайым және қолжетімді шешімдер тиімді екендігі дәлелденді.
Осыған байланысты әрбір елдімекен бойынша биылғы жылдың күзіне дейін жойқын су тасқынын болдырмау үшін қажетті шараларды қабылдау тапсырылды. Әкімдердің есептері Үкімет отырыстарында үнемі көпшілік алдында тыңдалатын болады.
Қарағанды облысы бойынша 20 елдімекен аумағында барлығы 90-ға жуық іс-шара орындалды. Шамамен 8 шақырым қорғаныс бөгеттері тұрғызылды және нығайтылды, өзен арналарының 45 км қауіпті аймағында санация жүргізілді, 11 км су бұру каналдары салынды және жөнделді, 18 км дренаж және су бұру жүйелері тазартылды, автомобиль жолдарының 66-ты учаскесінде су өткізуі ұлғайтылды, 54 су шаруашылығы объектілеріне жөндеу жүргізілді.
Сондай-ақ, қосымша 3765 тонна жанар-жағармай, 171 тонна азық-түлік, 64 мың тонна инертті материал, 189 мың дана қаптар дайындалды. Облыстың елді мекендерінің аумағынан 2 млн 600 мың м3 астам қар шығарылды. 45 шақырым су бұру траншеялары жасалды, 155 км каналдар мен арықтар, 4635 бірлік су өткізу құбырлары және 441 көпір тазартылды.
2015-ші жылғы ауқымды су тасқынынан кейін жүргізілген жұмыс соңғы 7 жылда 122 елдімекенде су басу қаупін барынша азайтуға мүмкіндік берді.
