Балқашта енді бұрын тек облыс орталығында жасалатын оталар жүргізіледі. Қаланың көпсалалы ауруханасы нейрохирург, ота жасайтын ЛОР-дәрігер және офтальмолог мамандарымен күшейтілді. Қарағанды облысында кадрлық әлеуетті нығайту мен жас мамандарды тартуға арналған жобалар жүзеге асырылып жатыр. Оның аясында көтерме төлемдер, тұрғын үймен қамту, білім гранттары мен медициналық инфрақұрылымды жаңарту қарастырылған.
Қарағанды облысы Денсаулық сақтау басқармасының Балқаштағы аумақтық өкілдігі бөлімінің басшысы Шолпан Қалықбекованың айтуынша, шешуші шаралардың бірі – көтерме төлемдерді енгізу.
– Бұрын бұл төлемдер 300–500 мың теңге көлемінде болса, қазір аса тапшы мамандықтар бойынша 5–8,5 миллион теңгеге дейін жетіп отыр, – деді Шолпан Қалықбекова.
Мамандарды тұрғын үймен қамтамасыз етуге де ерекше назар аударылған. Облыстық бюджет есебінен 18 пәтер жөнделді, медициналық колледждің жатақханасы жаңартылып, жас мамандарға 16 пәтер берілді. Өткен жылы үш қабатты «Дәрігерлер үйіне» күрделі жөндеу жүргізіліп, 30 пәтер дайындалды. Кілттерді облыс әкімі табыстады.
Сондай-ақ, денсаулық сақтау басқармасы, Балқаш әкімдігі және «Коунрад» корпоративтік қорының бірлескен жобасы аясында болашақ дәрігерлерді мақсатты даярлау жүргізілуде. Үш жылдан бері мектеп пен медицина колледжін тәмамдаған түлектер конкурс негізінде білім гранттарын алып келеді. Қазір 12 студент Қарағанды медицина университетінде оқып жатыр. Олар бакалавриатты аяқтағаннан кейін қалаға оралып, жұмысқа кіріседі. Кейін ауруханалардың қажеттілігіне қарай бейінді мамандықтар бойынша оқуларын жалғастырады.
Өткен жылы Балқаштың көпсалалы ауруханасына 27 дәрігер жұмысқа қабылданса, биыл тағы 16 маман келді.
– Әсіресе нейрохирургтың келуі аса маңызды. Бұрын қалада ондай маман болмаған. Қазірдің өзінде ол Балқашта бұрын жасалмаған оталарды жасап жүр. Сонымен қатар ота жасайтын ЛОР-дәрігер жұмысқа кірісті, ал қыркүйектен бастап офтальмолог қабылдайды. Енді катарактаға ота өзімізде жасалады, пациенттерді облыс орталығына жібермейміз. Қазір урологпен келіссөздер жүргізілуде, – деді көпсалалы аурухананың директоры Серікбол Түсіпбеков.
Жедел жәрдем стансасының ғимаратына жүргізілген реконструкция өткен жылы аяқталып, бұл еңбек жағдайын жақсартты әрі шұғыл көмек көрсету жеделдігін арттырды. Емхана базасында жаңа орталық ашылып, халықтың кеңес алу мүмкіндігі мен медициналық сауаттылығы арта түсті.
Медициналық колледждің оқу корпусы күрделі жөндеуден өтіп, онда 640-қа жуық студент білім алуда. Сондай-ақ 18 жасқа дейінгі балаларға арналған реабилитациялық орталық та жаңғыртылуда.
2026 жылға қарай көпсалалы ауруханаға ауданаралық мәртебе беріледі. Қосымша корпус құрылысы аяқталуға жақын. Онда ангиографиялық қондырғы орнатылып, шағын кардиоорталық ашылады. Бұл «алтын сағат» қағидасына сәйкес жедел оталарды жергілікті деңгейде жасауға мүмкіндік береді әрі Балқаш, Приозёрск, Шет және Ақтоғай аудандарының тұрғындарын заманауи медициналық көмектпен қамтамасыз етеді.
Кадр тапшылығын толық жою үшін жас мамандарды тарту жұмыстары жалғаса бермек.
