Майқұдық саябағы Конституция күніне орайластырылған «Ата Заңға 30 жыл: Тәуелсіз мемлекеттің берік тұғыры» атты ауқымды облыстық патриоттар форумының басты алаңына айналды.
Жиырма мыңнан астам адам бүкіл ел үшін маңызды күнді атап өтуге жиналды.
Қарағандылықтарды облыс әкімі Ермағанбет Бөлекпаев құттықтады.
Ол Конституция тәуелсіздіктің берік іргетасы және әрбір азаматтың құқықтары мен бостандықтарының кепілі болып табылатынын, елдің дамуы заңдылық, құқықтық тәртіп және тұрақтылық қағидаттарын сақтамай мүмкін еместігін атап өтті.
– Құрметті қарағандылықтар, Конституцияның 30 жылдығы – еліміздің әрбір азаматы үшін айтулы мереке. Бұл біздің әрқайсымызды қорғайтын, ертеңгі күнге сенімділік беретін және дамуға жол ашатын заң, – дейді Ермағанбет Бөлекпаев. – Конституцияның басты құндылығы – адам, оның құқықтары мен бостандықтары. Біздің Конституция елдегі бейбітшілік, тұрақтылық пен дамудың негізіне айналды. Ең бастысы, ол біздің қоғамдағы Заң мен Тәртіптің басымдығын бекітті. Президентіміз айтқандай, Конституцияның мызғымас құндылықтарына сүйене отырып, біз әділ Қазақстанды – баршаға бірдей мүмкіндіктер мемлекетін саламыз.
Форумда Полиция департаменті мен «Орталық» өңірлік қолбасшылығы қызметкерлері марапатталды.
Үздік учаскелік инспекторлар облыс әкімінің екі миллион теңге көлеміндегі сыйлығына ие болды.
Олардың барлығы кәсіби байқаудың жеңімпаздары.
– Органдарда 2010 жылдан бері жұмыс істеп келемін. Мен полицияда бірнеше буын қызмет атқарған әулет өкілімін. Атам ішкі істер органдарының ардагері. Басқа да туыстарым да осы жүйеде жұмыс істейді. Менің әкімшілік учаскемде бір жарым мыңға жуық адам тұрады. Негізінен барлығы адал азаматтар. Мен «Кәсібімнің үздігі» байқауына қатысып, тұрғындар маған дауыс берді, – деді Нұра аудандық полиция бөлімінің учаскелік инспекторы Дархан Жаңабылов.
Облыс әкімінің білім гранттарына мектеп түлектері ие болды.
– Мен өткен жылы мектепті бітірдім, ал биыл ҚарҰУ-ға, арнайы педагогика факультетіне түстім. Облыс әкімінің білім грантына ие болдым, – дейді Камилла Миллер. – Маған осындай мүмкіндік берілгеніне өте қуаныштымын. Кәсіби өмірімді педагогикамен байланыстырғым келеді. Мен балаларды жақсы көремін және олармен жұмыс істегім келеді.
Мемлекеттік қызмет ардагері Ғабит Тұяқов ведомстволық наградамен марапатталды.
Ал жұмысқа алғаш қабылданған жас мемлекеттік қызметкерлер ант қабылдады. Бұл ұрпақтар сабақтастығының символына айналды және жас мамандардың заң мен адалдық негізінде мемлекетке қызмет етуге дайындығын растады.
Қарағандылықтар мен қала қонақтары үшін саябақта тегін құқықтық кеңестер жәрмеңкесі ұйымдастырылды. Әділет, экономикалық тергеу, төтенше жағдайлар департаменттерінің, сондай-ақ өңірдің жетекші жоғары оқу орындарының мамандары заңнама, әлеуметтік кепілдіктер, құжаттарды ресімдеу, азаматтардың құқықтары мен міндеттерін қорғау мәселелеріне көмек көрсетті.
Мерекелік көңіл күй үшін жергілікті әртістер мен аты аңызға айналған қазақстандық «МузАРТ» тобы өнер көрсетті.
