25 қыркүйекте ҚР Орталық референдум комиссиясының Төрағасы Нұрлан Әбдіров 2024 жылғы 6 қазанға тағайындалған республикалық референдумды дайындау және өткізу шеңберінде инспекциялық сапармен Қарағанды облысына барды.
ОРК Төрағасы №792 және №794 учаскелерінде болып, дауыс беру күніне дайындық барысымен танысты. Оларды жабдықтау және дауыс берушілер үшін қолайлы жағдай жасау мәселелеріне баса назар аударылды.
Нұрлан Әбдіров аумақтық референдум комиссиялары төрағаларының, құқық қорғау және өзге де мемлекеттік органдар басшыларының қатысуымен кеңес өткізді, онда алдағы науқанның негізгі ерекшеліктері, республикалық референдум өткізуге дайындық, сондай-ақ электоралдық процесінің барлық кезеңдерінде жариялылық пен ашықтықты қамтамасыз ету, заңдылықты сақтау мәселелері талқыланды.
Облыс әкімінің орынбасары Әлібек Әлденейдің өңірде референдумға қатысуға құқығы бар азаматтардың тізімін нақтылау және науқанды материалдық-техникалық қамтамасыз ету бойынша жүргізіліп жатқан жұмыстар туралы, облыс прокурорының орынбасары Талғат Мұқашевтың электоралдық кезеңінде заңдылықты сақтау туралы, Қарағанды облысы Полиция департаментінің бастығы Негмет Исмағұловтың науқан кезеңінде және дауыс беру күні құқықтық тәртіпті сақтау туралы баяндамалары тыңдалды. Сондай-ақ атқарылған жұмыстар туралы Жұмыспен қамтуды үйлестіру және әлеуметтік бағдарламалар басқармасының басшысы Әсем Жүніспекова мен Қарағанды облысының АРК төрағасы Қайрат Нүркенов баяндады.
Өңірде 650 учаскелік комиссия жұмыс істейді, олардың құрамында 4440 адам бар. Облыс бойынша барлығы 761 604 сайлаушы тіркелген, оның 4605-і мүгедектігі бар адамдар. Олар үшін дауыс беруге барлық жағдайлар жасалады. Тұрғындарды әлеуметтік желілер, мессенджерлер арқылы ақпараттандыру ұйымдастырылды, арнайы онлайн-сервистер іске қосылды. 15 call-орталық ашылды, 109 қызметі жұмыс істейді.
26 қыркүйекте Астанада ОРК Төрағасы Астана және қала аудандарының АРК мүшелерімен, мемлекеттік және құқық қорғау органдарының өкілдерімен кеңес өткізіп, алдағы плебисцитке дайындық бойынша жүргізіліп жатқан жұмыстар туралы есептерін тыңдады.
Нұрлан Әбдіров кеңес қатысушыларына республикалық референдум өткізуге дайындықтың заңнамалық жаңашылықтары мен ерекшеліктерін түсіндірді. Ол сондай-ақ референдум және сайлау заңнамасының нормаларын қатаң сақтаудың, комиссиялардың барлық мүшелерін үздіксіз және сапалы оқытудың маңыздылығын атап өтті.
Қала әкімінің орынбасары Есет Бәйкен референдумға қатысуға құқығы бар азаматтардың тізімдерімен, референдумды ұйымдастырушылық, ақпараттық, материалдық-техникалық қамтамасыз етуге жүргізіліп жатқан жұмыстар туралы баяндады. Астана қаласының Жұмыспен қамту және әлеуметтік қорғау басқармасының басшысы Илья Скуб дауыс беру учаскелерінің физикалық қолжетімділігін қамтамасыз ету және мүгедектігі бар адамдардың сайлау құқықтарын іске асыру туралы хабардар етті.
Сондай-ақ, қалалық прокуратура мен полиция департаменті басшыларының орынбасарлары есеп берді. Астана қаласының аумақтық референдум комиссиясының төрағасы Бейсембай Жұмабеков референдум комиссияларының қызметі және дауыс беру күніне дайындық туралы баяндады.
Екі өңірде де ОРК басшысы дауыс беру күні жергілікті атқарушы органдардың электр қуатымен және интернетпен үздіксіз қамтамасыз етуге, ал ішкі істер органдарының – учаскелерде және іргелес аумақтарда қоғамдық тәртіпті сақтауға назарын аударды.
Жиын барысында Нұрлан Әбдіров аумақтық референдум комиссияларына тұрғындарды толық ақпараттандыруды қамтамасыз етуді тапсырды және дауыс беретін учаскелік комиссия мүшелерінің үйлерін аралап, жеке шақыруларды тапсыруының маңыздылығын атап өтті.
Сондай-ақ, барған өңірлерде Нұрлан Әбдіров аумақтық референдум комиссияларының мүшелерімен жеке кеңестер өткізді.
Оның алдында ОРК Төрағасы елорданың әр ауданындағы учаскелерге барып, дауыс беруге дайындық барысымен танысып, оларды жарақтандыру және дауыс берушілер үшін қолайлы жағдай жасау және мүгедектігі бар адамдардың сайлау құқықтарын қамтамасыз ету мәселелеріне ерекше назар аударды.
