Бүгін Қарағанды қаласында 22 жастағы Алика Мұхамадиеваға қатысты сот үкімі жарияланды. Ол әлеуметтік және ұлтаралық араздық тудырды деген айыппен кінәлі деп танылып, 3,5 жылға бас бостандығынан айырылды. Алайда жас анаға жазаны өтеу мерзімі екі жылға кейінге қалдырылды. Бұл шешім оның екі жасар баласының болуына байланысты қабылданған.
Прокурор сот отырысы кезінде айыпталушыға 4,5 жыл бас бостандығынан айыру жазасын сұрап, бірақ оның қызын ескеріп, үкімнің орындалуын бала 14 жасқа толғанға дейін кейінге қалдыруды ұсынған болатын.
Қазыбек би атындағы аудандық соттың шешімі бойынша Мұхамадиева ҚР қылмыстық кодексінің 174-бабының 1-бөлігі бойынша кінәлі деп танылды. Сонымен қатар, сот Қылмыстық кодекстің 74-бабына сәйкес жазаны кейінге қалдыру туралы қаулы қабылдады.
Іс материалдарына сәйкес, Алика Мұхамадиева шілде айында әлеуметтік желіде жариялаған жазбалары мен пікірлерінде қазақстандықтарды және мұсылмандарды қорлайтын сөздер айтқан. Бұл жазбалар қоғамда үлкен наразылық туғызған еді. Кейін ол көпшілік алдында кешірім сұрап, өз әрекетіне өкініш білдірді, алайда бұл оның жауапкершіліктен босатылуына әсер етпеді.
Сот отырысы кезінде айыпталушы көзіне жас алып, жұртшылықтан тағы да кешірім сұрады.
— «Мен қатты өкінемін, өз әрекетім үшін ұяламын. Кішкентай қызым бар, соны ескерулеріңізді өтінемін. Адам бардың қадірін оны жоғалтқанда ғана түсінеді», — деді Мұхамадиева.
