Футбол сиқыршысы Лионель Месси жасы ұлғайса да, жасымайтынын тағы бір мәрте дәлелдеді. Әлем чемпионатының кезекті матчында Аргентина құрамасы мен Аустрия арасындағы тартысты кездесу футболсүйер қауымға ұмытылмас сәттер сыйлады. Бұл ойынның басты қаһарманы – әрине, аңызға айналған Лео Месси.
Матч барысында Аустрия құрамасы барын салып, аргентиналықтарға лайықты қарсылық көрсетті. Алайда, Месси бар жерде кез келген қорғаныс қауқарсыз.
Бірінші таймда Лео айып алаңының сыртынан өзінің фирмалық соққысымен допты тоғыздыққа дәл қадап, есеп ашты.
Ал, екінші таймның қосымша уақытында қарсыластың қателігін сәтті пайдаланған Месси қорғаушыларды шаң қаптырып, есепті еселеді.
Бұл дубль Аргентинаға маңызды жеңіс сыйлап қана қоймай, футбол тарихының жаңа парағын ашты. Аустрия қақпасына соғылған бұл екі гол Мессиді Әлем чемпионаттары тарихындағы ең үздік сұрмергендер мен рекордшылардың көш басына шығарды.
Лионель Месси Әлем чемпионаттары тарихында ең көп гол соққан және нәтижелі пас берген (гол+пас жүйесі бойынша) жалғыз футболшы атанды. Ол Пеле, Роналдо және Мирослав Клозе сынды аңыздардың жетістігін артқа тастап, рекордтық көрсеткішке қол жеткізді.
Бұған қоса, Лео Әлем чемпионаттарында ең көп ойын өткізген және гол мен нәтижелі пас саны бойынша көш бастаған тарихтағы алғашқы әрі жалғыз футболшы атанды.
Матчтан кейін әлеуметтік желілер мен спорттық басылымдар Мессидің бұл жетістігін жарыса жазды. Сарапшылардың пікірінше, Леоның бұл рекордын жақын арада ешкімнің жаңартуы мүмкін емес. Ол қырықты алқымдаған шағында да әлемдік деңгейде феноменалды ойын көрсете алатынын паш етті.
Аргентина алға жылжуын жалғастыруда, ал Месси болса әр матч сайын футбол тарихын қайта жазуда.
