Қарағанды орталық саябағында үлкен Бұқпа өзенінің арнасын санациялау жобасы бойынша жұмыс жүргізілмек. Келесі аптада саябақ аумағында жабық коллекторды тазалау басталады. Содан кейін жергілікті тазарту жүйесі салынады.
Жоба бастамашылары мен мердігерлері жұмыстың пайдасы жайлы түсіндірді.
– Жоба бойынша саябақ ішінде жергілікті тазарту жүйелері салынады. Ол тәулігіне 12 мың текше суды өңдей алады. Осы арқылы саябақ көліне таза су келеді. Нәтижесінде бірнеше жыл ішінде онда қайта шомылуға болады. Қарағандылықтар жағажайда демалып, таза көлді тамашалай алады, – дейді "Гидро құрылыс" ЖШС учаске бастығы Нұралы Қалиев.
Үлкен Бұқпаны қалпына келтіру бойынша жоба екі жылға – 2025 жылдың соңына дейін есептелген. Жергілікті тазарту қондырғылары биыл салынуы керек. Бірақ алдымен коллекторды ретке келтіру керек. Қазір ол кір мен қоқысқа толы. Әр 40 метр сайын коллектордың жабын тақталары ашылып тазаланады.
Өзеннің саябақ аймағындағы бөлігі шамамен 2,5 шақырымды құрайды.
Жұмыс кезінде ағаштарды азырақ кесу жолдары ойластырылды.
Үлкен Бұқпаның арнасын тазарту сәуір айында басталған. Қазір техника Бұқар жырау даңғылы мен Сәтбаев көшесінің қиылысында жұмыс істеп жатыр.
Бұған дейін олар сантехникалық құдықтарды тазалаумен айналысқан. Олар толығымен дерлік лай, қоқыс және балластпен бітеліп қалған. Нұралы Қалиевтің айтуынша, 1100 текше лас масса қолмен тазартылған.
Жобаға тапсырыс беруші – Қарағанды облысының Табиғи ресурстар және табиғат пайдалануды реттеу басқармасы. Табиғатты қорғау бағдарламалары және су ресурстарын реттеу бөлімінің басшысы Шахназар Сейтімов бақылау тұрақты жүргізіліп жатқанын хабарлады. Нысанда авторлық және техникалық қадағалау жүзеге асырылады.
Үлкен Бұқпаның жалпы ұзындығы – 17 км. Санация өзеннің басынан бастап Костенко атындағы шахта майындағы Сокыр өзеніне құятын жерге дейін бүкіл арна бойынша жүргізіледі. Қоқыстарды және қопаларды тазартудан басқа, арналарды тереңдету және кеңейту қарастырылған. Бұл тасқын сулардың кедергісіз өтуі үшін қажет.
