Саран қаласы индустриялық аймақты дамытудың арқасында жақсы дамып келеді: тұрғын үйлер салынуда, жаңа бизнес нысандары ашылуда және жаңа жұмыс орындары ашылуда. Қазір бірінші кезекте өмірлік маңызы бар мәселелер тұр: су, жарық, жылу, кәріз, абаттандыру, тазалық пен тәртіп.
Қарағанды облысының әкімі Ермағанбет Бөлекпаев тұрғындармен кездесу барысында қаланың дамуын талқылады.
Аймақ басшысы орталық жылу көзінің жұмысы бақылауда қалатынын атап өтті. Қазір оған 182 көпқабатты тұрғын үй мен 26 әлеуметтік нысан қосылған. Қала әкімі Дарын Бұлқайыр «Горняк» ықшам ауданындағы үйлерді қосу үшін үй ішінде таратқыш жасалатынын хабарлады. Міндет – толығымен орталықтандырылған жылытуға көшу.
– Тұрғындарда сұрақ туындамас үшін кесте жариялаңыздар. Жиналыс өткізіп, барлық мәселелерді тұрғындармен бірге шешіңіздер, – деді Ермағанбет Бөлекпаев қала басшылығына.
Тағы бір маңызды мәселе – электр энергиясымен тұрақты жабдықтау. Коммуналдық меншікке иесіз қалған электр желілері – 32 нысан қабылданды. Қалалық бюджеттен электр желілері мен фидерлерді жөндеуге қаражат бөлінді. Көше жарығын қалпына келтіру жалғасуда: биыл Саранда 400-ден астам жаңа жарық тіректері орнатылады.
Көлік инфрақұрылымын жақсартуға назар аударылады. Қала әкімінің мәліметінше, биыл Саран мен Ақтас кентіндегі 11 көше жөндеуден өтеді. РТИ трассасындағы темір жол арқылы өтетін жол өткелін қайта жаңарту көзделген. Бұдан басқа, индустриалды аймақтан Қарағандыға айналма жол салу жоспарда бар. Бұл үлкен жүк машиналар трассаны жүктемеуі үшін қажет.
Тұрғындар облыс орталығына баратын 165-ші маршрутқа шағымданып, автобус қосуды сұрады. Облыс әкімі оңтайлы шешім табуды тапсырды.
Кездесуде қасбеттерді жөндеу, балалар алаңдарын абаттандыру мәселелері көтерілді.
Қала әкімі қаланың келбеті тұрғындардық қатысуымен жақсарып келе жатқанын атап өтті: «Халық қатысатын бюджет» жобасы бойынша биыл балалар, ойын және спорт алаңдарын абаттандыруды қарастыратын 11 жоба жүзеге асырылуда. Дубовкада балалар алаңы орнатылды. Плановый ауылында спорт әуесқойларына арналған футбол және волейбол алаңдары салынды. Жамбыл көшесінде жаңа гүлзар ашылады, ал «Сұңқар» саябағында және Мәдениет үйінің жанында заманауи ойын кешендері орнатылады.
Дарын Бұлқайыр мектептердің жөнделуі туралы да айтып берді. Жаңа оқу жылына қарай қалада үш оқу орны күрделі жөндеуден өтеді. Жұмыстар шатырды, қасбетті, жылыту жүйесін ауыстыруды қамтиды. Тағы он мектепте ағымдағы жөндеу жұмыстары қарастырылған.
Кездесуден кейін Ермағанбет Бөлекпаев жеке мәселелер бойынша қабылдау өткізді.
