Қарағанды облысының оқушылары геометрия және киберқауіпсіздік бағытындағы жобаларымен Астанада өткен Өмірбек Жолдасбеков атындағы математика және механика бойынша халықаралық зерттеу жобалары конкурсында күміс жүлдеге ие болды.
Байқауға 11–12 сыныптардың 135 оқушысы қатысып, олардың қатарында Таиланд пен Түркиядан келген 20 оқушы да болды. Қатысушылар қазылар алқасына жалпы 99 жобаны ұсынды. Қарағанды облысынан төрт жас зерттеуші бақ сынады.
«Дарын» мамандандырылған мектеп-лицей-интернатының оқушылары Мадияр Ізбасар мен Дінислам Бұқар GeometryPro атты бірлескен жобаны әзірледі. Бұл — геометрияны оқытуға арналған интерактивті білім беру платформасы, ол күрделі тақырыптарды визуализация және практикалық тапсырмалар арқылы түсінуді жеңілдетеді.
— Біздің жобаның мақсаты — геометриялық фигураларды тануға арналған оқулық әзірлеу болды. Біз геометрияны барынша көрнекі әрі қолжетімді етуді көздедік, әсіресе абстрактілі ұғымдарды қабылдауы қиын оқушылар үшін, — деді Дінислам Бұқар.
Байқауда оқушылар платформаның өзін және оны тестілеу нәтижелерін таныстырды. Қазылар алқасы әзірлеменің практикалық маңызын және білім беру саласындағы әлеуетін жоғары бағалады. Нәтижесінде команда екінші орынды иеленді.
— Менің ойымша, жеңіске жету үшін бізге кейбір функцияларды тереңірек пысықтау және, мүмкін, нақты пайдаланушылармен ауқымдырақ тестілеу жетіспеді. Дегенмен бұл тәжірибе өте құнды болды: біз пайдалы кері байланыс алып, жобаны жетілдіруді жоспарлап отырмыз, — деді Мадияр Ізбасар.
Тағы бір күміс жүлдені Шет ауданы Ә. Ермеков атындағы тірек мектеп-интернатының оқушысы Ақмарал Байболат өңір қоржынына салды. Сонымен қатар ол Satbayev University білім беру грантының иегері атанды.
Оның жобасы заманауи алаяқтық түрлеріне қарсы күреске арналған және прототип элементтері бар мини-қосымша тұжырымдамасын ұсынады. Негізгі идея — телефон арқылы сөйлесу барысында әңгімелесушінің сөзін талдап, жасанды интеллект көмегімен алаяқтық белгілерін анықтау. Ұсынылған жүйе сөздер мен тіркестерді қадағалап, олардың ықтимал қауіптілігін бағалай алады. Күдікті белгілер анықталған жағдайда пайдаланушыға ескерту беріледі.
Сонымен қатар жоба «дауыс ізі» технологиясын қолдану мүмкіндігін де қарастырады. Бұл болашақта әртүрлі нөмірлерден қоңырау шалатын адамның бір тұлға екенін анықтауға мүмкіндік беріп, алаяқтарды әшкерелеуді жеңілдетеді.
— Екінші орын алып, Satbayev University грантын жеңіп алу мен үшін маңызды нәтиже. Мұның артында көпжылдық еңбек жатыр. Ең бастысы — мықты қатысушылар арасында өзімді көрсетіп, үздіктер қатарына ене алдым, — деді Ақмарал Байболат.
Қарағанды облысынан қатысқан төртінші оқушы — Шет ауданы Жамбыл Ақылбаев атындағы мектеп-гимназиясының оқушысы Ақтілек Ораза ерекше жетістіктері үшін арнайы марапатқа ие болды.
