Екі мыңға жуық адам ауырды: Денсаулық сақтау министрлігі қызылшаға байланысты дабыл қақты

Қазақстанда қызылшаға шалдығу деректері әлі де азаймай отыр, деп хабарлайды Life09 ақпарат агенттігі Stan.kz-ке сілтеме жасап. Денсаулық сақтау министрлігінде эпидемиологиялық жағдайға байланысты шұғыл кеңес өтіп, аурудың негізгі себебі – вакцинациядан бас тарту екені айтылды.

Министрлік мәліметінше, жыл басынан бері елде 1 951 қызылша жағдайы тіркелген. Аурушаңдық ең жоғары өңірлер қатарында Астана (581), Жамбыл облысы (339), Алматы қаласы (317) және Алматы облысы (146) бар.

Эпидемиологиялық талдау нәтижесіне сәйкес, ауырғандардың 79%-ы екпе алмаған, 8,4%-ы вакцинацияның толық курсын өтпеген, ал 10%-ының иммундық мәртебесі белгісіз. Вакцина алмаған балалардың шамамен 59%-ы ата-аналардың шешімімен екпеден тыс қалған.

Қызылша – аса жұқпалы вирустық ауру. Вакцина болмаған жағдайда ол пневмония, есту қабілетінің төмендеуі, жүйке жүйесінің зақымдануы сияқты ауыр асқынуларға әкелуі мүмкін. Ерекше қауіп тобында – жас балалар, жүкті әйелдер және созылмалы ауруы бар адамдар.

Денсаулық сақтау министрлігі қызылшадан қорғанудың ең тиімді жолы – вакцинация екенін еске салып, азаматтарды екпе мәртебесін тексеріп, ұлттық күнтізбеге сай вакцина алуға шақырды.