Қарағанды облысының әкімі Ермағанбет Бөлекпаев ТЖД бастығы Марғұлан Аманбаевпен бірге аймақты тікұшақпен аралау кезінде Бұқар жырау және Абай аудандарындағы Нұра және Шерубай-Нұра өзендері арналарының бойындағы аумақты аралап көрді.
Павлодар облысымен шекарадағы Ақжар бөгеті де назарға алынды. Қазір су қоймасы қысқы режимде.
Ермағанбет Бөлекпаев Павлодар облысының әкімі Асаин Байхановпен ықтимал тәуекелдерді талқылады.
Жалпы Қарағанды облысы бойынша су тасқынына қарсы іс-шаралар жалғасуда: қар шығару, каналдарды, арықтарды және су өткізу құбырларын тазалау жүргізіліп жатыр.
Облыстың ірі су қоймаларынан суды алдын ала ағызу жүргізіледі.
Бұл өзен арналарын жууға, сондай-ақ су қоймаларына тасқын суларды қабылдау үшін қажетті көлемнің қорын құруға мүмкіндік береді.
ТЖД төтенше жағдайлардың алдын алу басқармасының бастығы Қанат Ысқақов мұз кептелістерін және тасқын сулардың кедергісіз өтуін болдырмау үшін өзендердегі жарылыс жұмыстары туралы айтып берді. Бұқар жырау, Нұра және Абай аудандарында су тасқыны қаупі бар бес өзен учаскесі қамтылды. Жарылыс жұмыстарының жалпы ауданы 4500 шаршы метрді құрады.
Су тасқыны қаупі бар елді мекендерде қауіп-қатерді азайту үшін 65 шақырымнан астам қорғаныс үйінділері тұрғызылып, нығайтылды. Сондай-ақ жалпы ұзындығы 18,5 км учаскелерде өзен арналарын санациялау жүргізілді. Республикалық, облыстық және жергiлiктi маңызы бар автомобиль жолдарының 75 учаскесiнде су өткiзу қабiлетi ұлғайтылды.
Қазіргі уақытта екі миллион текше метрге жуық қар шығарылды. Су бұру каналдары мен арықтарын орнату және тазалау, сондай-ақ қаптарды салу жалғасуда. Бұқар жырау, Шет, Қарқаралы және Ақтоғай аудандарында бұл жұмыстарға ТЖД күштері мен әскери қызметшілер тартылды.
Аралау барысында қардың әлі де көп екені байқалды. Ауадан қорғаныс біліктерінің жағдайы тексерілді.
Су тасқыны жағдайы тұрақты бақылауда. Облыста су тасқынына қарсы іс-қимыл жөніндегі жедел штаб іске қосылды.
Осындай штабтар барлық қалалар мен аудандарда құрылған.
Тұрғындар сондай-ақ 109 нөмірі бойынша Ахуалдық орталыққа және 112 нөмірі бойынша Төтенше жағдайлар департаментіне хабарласа алады.
