Қарағанды облысында ҚР Төтенше жағдайлар министрлігінің «Ауыл құтқарушылары» бағдарламасы аясында тағы бір ерікті өрт сөндіру жасағы жұмысын бастады. Жергілікті атқарушы органдардың қолдауымен Шет ауданына қарасты Өспен ауылында өрт сөндіру бекеті ашылды. Ол өрт пен өзге де төтенше жағдайларға жедел әрекет етуге мүмкіндік беріп, төрт елді мекеннің 1 400-ден астам тұрғынының қауіпсіздігін қамтамасыз етуге үлес қосады. Бұл туралы Life09 ақпарат агенттігі Қарағанды облысы Төтенше жағдайлар департаментіне сілтеме жасап хабарлайды.
Өспен ауылынан бөлек, ерікті өрт сөндірушілер Еркіндік, Айса және Айғыржал ауылдарына да қызмет көрсетеді. Бекетте алты адам жұмыс істейді. Оның төртеуі – өрт сөндіруші, екеуі – жүргізуші. Бекет өрт сөндіру автоцистернасымен және байланысқа арналған радиостанциялармен жабдықталған.
Жаңа бекеттің ашылуы өрт сөндірушілердің оқиға орнына жету уақытын қысқартып, өртті сөндіру тиімділігін арттыруға мүмкіндік береді. Бұл әсіресе шалғай ауылдардың тұрғындары үшін маңызды. Мұндай елді мекендерде шұғыл қызметтердің оқиға орнына уақытылы жетуі шешуші рөл атқаруы мүмкін.
«Ауыл құтқарушылары» бағдарламасы аясында өңірде ауылдық жерлердегі өрт қауіпсіздігі жүйесін дамыту жұмыстары жалғасып жатыр. Нәтижесінде шалғай елді мекендердің тұрғындары үшін шұғыл көмектің қолжетімділігі арта түседі.
