Саран қаласындағы №7 мектеп-интернатта «Заң және тәртіп» идеологиясы мен «Адал азамат» тәрбие жұмысы бағдарламасы аясында жаңа «Жас сақшы» сыныбы ашылды. Бұл бастама оқушылардың құқықтық мәдениетін, патриотизмін және заңға жауапкершілікпен қарауын қалыптастыруға бағытталған.
Биыл полиция департаменті білім басқармасымен бірлесіп пилоттық жобаны Қарағанды облысының алты мектебінде жүзеге асырды.
Сыныптар Қарағандыда (№34 және №17 мектептерде), Балқашта (Б. Момышұлы атындағы мектеп), Теміртауда (№17 мектеп), Приозерскте (№1 мектеп) және Саранда (№7 мектеп-интернат) ашылды. Жобаға барлығы 134 оқушы қатысуда.
Білім басқармасының балалардың құқығын қорғау бөлімінің бас маманы Данияр Тоқмағамбетовтың айтуынша, мұндай сыныптар ұстаздар, ата-аналар және құқық қорғау органдарының бірлескен жұмысына арналған алаңға айналады.
– Мұнда профилактикалық іс-шаралар, кәсіби бағдар беру сабақтары өткізіліп, құқықтық тәртіп негіздері үйретіледі, – деп түсіндірді Данияр Тоқмағамбетов.
2025 жылғы қыркүйектен бастап Қазақстандағы барлық мектептер, соның ішінде жекеменшік мектептер де, бірыңғай «Адал азамат» тәрбие бағдарламасына көшті. Бағдарламаның мақсаты – елдің мәдениеті мен дәстүрін құрметтейтін, ізгі қасиеттерге ие және белсенді азаматтық ұстанымы бар тұлға қалыптастыру. Негізгі назар адалдық, әділдік, жауапкершілік пен патриотизм сияқты қасиеттерге аударылған.
