2025 жылғы 17 мамыр күні сағат 03:30 шамасында Астана – Қарағанды автожолының бойында, Ошаганды ауылы маңында ерекше және алаңдататын жағдай тіркелді. “Лада Приора” маркалы жеңіл автокөлік түнгі уақытта кенеттен жолға шығып кеткен сайғақтар табынына соғылды, деп хабарлайды Life09 ақпарат агенттігі Stan.kz-ке сілтеме жасап.
Мәліметтерге сенсек, 23 жастағы жүргізуші апатты болдырмауға үлгермей қалған. Көлік қатты зақымданып, қалпына келмейтін жағдайда. Жүргізуші жеңіл шошып қалған, жағдайы қанағаттанарлық деп бағаланды. Ал көлікте болған 20 жастағы жолаушы қыз түрлі жеңіл жарақаттар алған.
Оқиға салдарынан бірнеше сайғақ мерт болды. Бұл жағдай жолда абай болу қажет екенін, әсіресе, жабайы жануарлар жолға шығуы мүмкін аймақтарда, тағы бір мәрте еске салады.
Аталған факт полицияда тіркеліп, процессуалдық шешім қабылдау үшін материалдар ветеринариялық инспекцияға жолданды.
"Жануарлардың қатысуымен болған жол апатының себептері мен жағдайларын жою мақсатында "ҚазАвтоЖол" АҚ-ына ұсыныс енгізілді. Онда жабайы жануарлардың жолға шығуы мүмкін екенін ескертетін арнайы жол белгілерін орнату және олардың жолға шығуына тосқауыл болатын физикалық қоршаулар қою ұсынылған", – делінген Қарағанды облысы полиция департаментінің хабарламасында.
