Балқашта, Бертіс шығанағы ауданында алдағы жылдары 30-ға жуық жаңа демалыс орыны жұмыс істей бастауы тиіс. Өңірдің туристік әлеуетін дамыту Қарағанды облысының әкімдігінде өткен аппараттық кеңесте талқыланды.

Өңірде туристер үшін ең тартымды орындар Балқаш курорттық аймағы және Қарқаралы ауданының табиғи оазисі болып қала береді. Олар биылғы жылы топ-20 және 50 дестинацияға кірді. Қонақтарға жайлы болуы үшін туристік инфрақұрылымды жақсарту бойынша жұмыстар жүргізілуде.

– Туризмді дамыту үшін Балқашта жол картасы әзірленіп, бес негізгі бағыт анықталды. Оның ішінде Бертіс шығанағы ауданында инженерлік-коммуникациялық инфрақұрылымды абаттандыру, салу жұмыстары аяқталды. Бірінші және екінші жолақта 28 учаске анықталды. Мамыр айының ортасында біз екінші қатардағы демалыс аймақтарын салуға аукционды бастаймыз, бірінші қатардағы демалыс орындарының егжей-тегжейлі жоспарлау жобасы түзетуге жіберілген. Осылайша, алдағы жылдары бізде 28 жаңа демалыс аймағы пайда болады, – деді Балқаш әкімі Сапар Сатаев.

Тораңғалық және Шұбар-түбек кенттерінде су құбырын жүргізуге жобалық-сметалық құжаттама әзірленді. Балқаш жағалауы дамып келеді.

Қарқаралы ауданында жыл сайын 23 мыңнан астам туристке қызмет көрсететін 37 үй мен демалыс аймағы жұмыс істейді. Көлік инфрақұрылымын жақсарту үшін Қарағанды – Қарқаралы жолына орташа жөндеу жұмыстары жүргізілуде.

Инвесторларды тарту үшін Қарқаралы табиғи паркінің аумағында жалпы ауданы 10 гектардан асатын 20 жер учаскесі бар. Туризмнің өсу нүктесі ретінде Қарқаралының батыс бөлігінде, ұлттық табиғи паркімен шекарада "Бұғылы" рекреациялық аймағы анықталды. Салынып жатқан "Ту тұғыры" мемориалы мен бөгет ауданы аймақтың жалғасы болады.

– Балқаш және Қарқаралы ауданының әкімдері "ҚазАвтоЖолмен" бірлесіп жол бойында және туристік тартымды жерлерде жаңа санитарлық-гигиеналық тораптар салу жөніндегі жұмысты жалғастыруы тиіс. Жолаушылар көлігі басқармасы туристік аймақта қажет болған жағдайда маршруттар санын көбейте отырып, көлік құралдарының үздіксіз жұмысын қамтамасыз етсін, – деп тапсырды Облыс әкімі Ермағанбет Бөлекпаев. – Жаппай демалу орындарындағы қауіпсіздік мәселесі маңызды болып табылады.

Қарқаралы курорттық аймағын танымал ету үшін қаланың 200 жылдығын мерекелеу аясында Mountain Bike веломарафоны, блогерлер мен БАҚ үшін ақпараттық тур, сондай-ақ "Бұғылы Travel" марафоны ұйымдастырылады.