1 сәуірдегі жағдай бойынша, Қазақстандағы адам саны 19 178,8 мыңға жетті, - деп хабарлайды Стратегиялық жоспарлау және реформалар агенттігі Ұлттық статистика бюросы.
Қалалықтар саны - 11 419,8 мың (59,5 пайыз), ауылдықтар - 7 759 мың адам (40,5 пайыз). 2021 жылғы 1 сәуірмен салыстырғанда халық саны 238,3 мың адамға немесе 1,3 пайыз өсті.
2022 жылғы қаңтар-наурызда республика халқының табиғи өсімі 2021 жылғы қаңтар-наурызбен салыстырғанда (64,3 мың адам) 10,6 пайызға кеміп, 57,5 мың адам болды. Табиғи өсімнің жалпы коэффициенті 1000 адамға шаққанда - 12,13 адам.
АХАТ органдары ұсынған азаматтық хал актілері жазбаларындағы мәліметтерді өңдеу нәтижесінде, 2022 жылғы қаңтар-наурызда туғандар саны 95,6 мың адамға жетті, бұл 2021 жылғы қаңтар-наурызға (100,5 мың адам) қарағанда 4,8 пайыз аз.
Қарастырылып отырған кезеңде қайтыс болғандар саны - 38,1 мың, бұл 2021 жылғы қаңтар-наурызға (36,1 мың адам) қарағанда 5,4 пайызға көп.
2022 жылғы қаңтар-наурызда республикада 1 жасқа дейін шетінеген 828 нәресте тіркелді. 2021 жылғы кезеңмен салыстырғанда (815 шетінеген нәресте) 1,6 пайызға артты.
