«ХҚКО» мобильді қосымшасында автокөлікті онлайн сатып алу-сату келісімшартын рәсімдеуге мүмкіндік беретін жаңа сервис қолжетімді болды. Қызмет 2 қыркүйектен бастап жұмыс істей бастады. Бұл жаңалық рәсімдеу үдерісін айтарлықтай жеңілдетті.
Жаңашылдықтың басты артықшылығы — мәмілені мамандандырылған ХҚКО-ға бармай тұрып, алдын ала ресімдеу мүмкіндігі. Бұл күту уақытын қысқартып қана қоймай, қағаз құжаттарды сол жерде толтыру қажеттілігін жояды. Қосымша арқылы келісімшартқа қол қойылғаннан кейін оны көлікті тіркеуді аяқтау үшін ұсынса жеткілікті.
Бұған дейін көлік сату-сатып алу келісімін рәсімдеу үшін азаматтарға халыққа қызмет көрсету орталығына барып, қағаз нұсқадағы келісімшартқа қол қойып, оны QR-код арқылы растау қажет болатын. Енді бұл үдеріс толығымен онлайн форматқа көшті: сатушы мен сатып алушы құжатқа электрондық цифрлық қолтаңба қойып, жүйе мемлекеттік деректер базасымен интеграция арқылы ақпаратты автоматты түрде тексереді. Электронды формат техникалық қателіктерді болдырмайды және жалған құжат жасалу қаупін төмендетеді.
Рәсімделген келісімшарт сервис тарихында сақталады және толық заңды күшке ие.
Қызметке қол жеткізу үшін «ХҚКО» мобильді қосымшасында ЖСН мен телефон нөмірі арқылы авторизациядан өту қажет.
Жаңа сервис автокөлікті сатып алу-сату келісімін рәсімдеудің дәстүрлі тәртібін алмастырмайды, тек оны толықтырып, азаматтарға анағұрлым ыңғайлы балама ұсынады.
Дереккөз: Gov.kz
