Президент Қарағандыдағы автобус құрастыратын «QazTehna» зауытына барып, кәсіпорынның жұмысымен танысты. Сондай-ақ Мемлекет басшысы зауыт жұмысшыларымен әңгімелесті, деп хабарлайды LIFE09 ақпараттық агенттігі ҚР Президенті Әкімшілігінің Теlegram каналына сілтеме жасап.
Президентке кәсіпорын жұмысының алғашқы нәтижелері туралы баяндалды.
Зауыт 2021 жылдан бері жолаушылар тасымалына арналған 347 автобус пен электробус құрастырып шығарған. Биыл жыл соңына дейін қоғамдық көлік желісін жаңарту бағдарламасы аясында өңірлерге 700-ден аса автобус пен электробус жеткізу жоспарланып отыр. Оның ішінде 208 автобус еліміздің тоғыз облысындағы білім беру ұйымдарына жіберілмек.
Зауыт әлемдегі жолаушылар көлігін өндіруші Yutong компаниясымен серіктестік орнатқан. Серіктестік аясында компания қазақстандық зауытқа қажетті технологияны кезең-кезеңімен береді. Қазіргі кезде автобустар бөлшегінің 33 пайызы жергілікті материалдардан құрастырылады. Алдағы бес жылда бұл көрсеткішті 50 пайыздан асыру жоспарланып отыр.
Бүгінде зауытта 560 адам жұмыс істейді. Еңбек ұжымының басым бөлігі - Саран қаласының жергілікті тұрғындары.
