Қоғамдағы тұрақтылық пен бірлікті сақтауда мемлекет пен діни бірлестіктер арасындағы өзара түсіністік пен ынтымақтастық ерекше маңызға ие. Әсіресе көпұлтты және көпконфессиялы мемлекеттер үшін бұл мәселе қоғамдық келісім мен тұрақты дамудың басты факторларының бірі болып саналады. Мемлекет пен конфессиялар арасындағы үйлесімді қарым-қатынас қоғамдағы татулықты нығайтып, азаматтардың рухани және әлеуметтік дамуына оң әсер етеді.
Қазақстан зайырлы мемлекет ретінде барлық азаматтардың ар-ождан бостандығын құрметтейді және әрбір адамның өз діни сенімін ұстануына немесе ешқандай дінді ұстанбауына құқық береді. Бұл қағида еліміздің Конституциясында бекітілген және мемлекеттік саясаттың негізгі бағыттарының бірі болып саналады. Осыған байланысты мемлекет барлық діни бірлестіктерге заң аясында тең жағдай жасап, олардың қызметінің ашық әрі бейбіт түрде жүзеге асуына мүмкіндік береді.
Мемлекет пен діни ұйымдар арасындағы дұрыс қалыптасқан қарым-қатынас қоғамдағы тұрақтылықты сақтауға және түрлі түсініспеушіліктердің алдын алуға көмектеседі. Діни бірлестіктер адамдарды ізгілікке, мейірімділікке, өзара құрмет пен адамгершілікке тәрбиелеуде маңызды рөл атқарады. Ал, мемлекет қоғамдық қауіпсіздікті қамтамасыз ету, заң талаптарының сақталуын бақылау және діни алауыздықтың туындауына жол бермеу бағытында жүйелі жұмыстар жүргізеді.
Қазіргі уақытта әлемде діни экстремизм мен радикалды идеологиялардың таралуы өзекті мәселелердің бірі болып отыр. Мұндай қауіптердің алдын алу үшін мемлекет пен діни ұйымдардың бірлескен жұмысы ерекше маңызды. Әсіресе жастар арасында дұрыс діни түсінік қалыптастыру, ұлттық және рухани құндылықтарды насихаттау арқылы қоғамда тұрақты әрі қауіпсіз орта қалыптастыруға болады.
Бұл ретте ақпараттық-түсіндіру жұмыстарының маңызы зор. Теологтар, дінтанушылар және қоғам қайраткерлері халықпен кездесулер өткізіп, дәстүрлі діндердің құндылықтары мен зайырлылық қағидаларын түсіндіру арқылы қоғамда дұрыс көзқарас қалыптастыруға үлес қосады. Мұндай жұмыстар азаматтардың діни сауаттылығын арттырып, жат идеологиялардың ықпалына қарсы тұруға көмектеседі.
Сонымен қатар, конфессияаралық келісім мен диалогты дамыту да қоғам үшін маңызды. Әртүрлі діни ұйымдардың өзара сыйластықта өмір сүруі, бір-бірінің сеніміне құрметпен қарауы қоғамдағы бейбітшілік пен татулықты нығайтады. Бұл өз кезегінде елдегі қоғамдық-саяси тұрақтылықтың сақталуына ықпал етеді.
Қорытындылай келе, мемлекет пен конфессиялар арасындағы үйлесімді қарым-қатынасты дамыту – қоғамның тұрақты дамуының негізгі шарттарының бірі. Өзара құрметке, сенімге және заңдылыққа негізделген серіктестік қоғамда бірлік пен келісімді нығайтып, еліміздің болашақта да бейбіт әрі тұрақты дамуына негіз болады.
Қарағанды облысы дін мәселелері бойынша ақпараттық – түсіндіру тобының мүшесі Ж.Әбішев
