Бокстан ұлттық құраманың бас бапкері Мырзағали Айтжанов «Спорт министрі» арнасына берген сұхбатында қазақ боскшыларының ең басты кемшілігін айтты, деп хабарлайды LIFE09 ақпарат агенттігі.
Ол біздің боксшыларға жаттығудан бөлек қара жұмыспен айналысқан дұрыс деп санайды.
«Жаттығу барысында бізден асып тұрған ешкім жоқ. Барлық жерде ауызбіршілік бар. Өзбектердің бізден артықшылығы – жігіттері тәртіпті, спортшылары еңбекқор. Үйіне келіп, үй шаруасын істеп, малға қарап, жер аударып жүреді. Ал, біз осы жағынан сәл осал болып тұрмыз. Біздің жігіттердің бәрі – қаланың балалары. Мен кейде кекетіп «байдың балалары» деп қоямын. Бәрі ақсаусақ болып кеткен сияқты. Сол үшін ешкімді аямау керек. Қазақтың балаларын жұмысқа салу керек. Жұмыстан ешкім өлмейді. Күшейіп, қатайып, мықты, шымыр жігіттер болады», - деді Мырзағали Айтжанов.
Сондай-ақ, бас бапкер өзінің жеңілісін өзгеден көретін боксшылар туралы айтты.
«Жігіттеріміздің кейбірі тойлап қойды, жүріп қалды. Сөйтіп, өзінің бабына келмей, дұрыс бокстаса алмай, мамандарды кінәлағандары өте ұят деп ойлаймын. Мен тек естімей-ақ, кім айтуы мүмкін дегенге айтып жатырмын. Сол боксшының бапкерлері айтуы мүмкін. Біреуден іздейді. Адам бірінші кезекте кінәні өзгеден емес, өзінен іздеуі керек. Кем-кетікпен жұмыс істеп, қайтадан күшті боламыз деп жатырмын», - дейді ол.
