Иран Ислам Республикасының астанасы Тегеранда өткен жеңіл атлетикадан жабық кешендегі XI Азия чемпионатында Қазақстан Ұлттық құрамасы 12 медаль жеңіп алды, деп хабарлайды Life09 ақпарат агенттігі.

ҚР Туризм және спорт министрлігі мәлім еткендей, биылғы бәсекеде Қазақстан спортшылары 4 алтын, 2 күміс пен 6 қола жүлдеге қол жеткізді.

Шешуші жарыс күні эстафетада (4*400 м) еліміздің ерлер (Андрей Соколов, Эльнор Мухитдинов, Ефим Тарасов, Вячеслав Земс) және әйелдер құрамасы (Аделина Земс, Анна Шумило, Мария Шувалова, Кристина Кондрашова) топ жарды. Оның алдында Елизавета Матвеева (биіктікке секіру) мен Давид Ефремов (60 м кедергілер арқылы жүгіру) чемпион атанды.

Иван Иванов (ядро лақтыру) пен Ольга Сафронова (60 м жүгіру) күміспен күптелді.

Ал, Аяна Болатбекқызы (1500 м жүгіру), Мария Ефремова (3 қарғып секіру), Ақбаян Мұрмәмет (800 м жүгіру), Алина Чистякова (көпсайыс) Эфим Тарасов (400 метр жүгіру), Максим Фроловский (3000 метрге жүгіру) жүлдегерлер қатарынан көрініп, қолаға қол жеткізді.

Максим Фроловский 3 мың метрге жүгіруде мәреге 5-болып келген. Алайда алдыңғы 2 адам ереже бұзғандықтан қола медаль қазақстандық атлетке берілді. Сондай-ақ, Максим 23 жасқа дейінгі санатта Қазақстан рекордын тіркеді (8:17.17).

Тегеранда барлығы 29 қазақстандық атлет ел намысын қорғады.

Былтыр жабық кешендегі Азия чемпионаты Астана қаласындағы «Qazaqstan» жеңіл атлетика кешенінде өткен. Ол кезде Ұлттық құрама 6 алтын, 3 күміс, 3 қола медальмен жалпы есепте 2-орын алған.