Қарағандыда белгілі қазақ композиторы Нұрғиса Тілендиевтің 100 жылдық мерейтойы атап өтіледі. Концертке алты дарынды дирижер қатысады.
Мерейтойлық күнді мерекелеу үшін Қарағандыға Тәттімбет атындағы қазақ халық аспаптары оркестрінің бірінші бас дирижері, ҚР еңбек сіңірген қайраткері Дүйсен Үкібай шақырылды.Еңбек жолын енді бастағанда Нұрғиса Тілендиевпен жұмыс істеу бақытына ие болған. Одан басқа, Қарағанды сахнасында Н. Тілендиев атындағы дирижерлер байқауының бас жүлдегерлері – Дәурен Ғылымов, Ерболат Ахмедияров және Әбілқайыр Сағымбаев өнер көрсетеді.
Сондай-ақ, концертке Тәттімбет атындағы қазақ халық аспаптары оркестрінің бас дирижері, мәдениет үздігі Ерлан Бақтыгерей және оркестрдің көркемдік жетекшісі, ҚР еңбек сіңірген қайраткері Әбуғалисын Шоқанбаев қатысады.
Бағдарламаны Тәттімбет атындағы қазақ халық аспаптарының академиялық оркестрі «Ата толғауы» шығармасымен ашады. Қали Байжанов атындағы концерттік бірлестіктің әртістері Балғабек Смағұлов, Дәуренбек Аркенов, Меруеш Башай, Сырым Хордин, Медет Осатаев, Азамат Елеусін, Рысты Рахымжан және басқалар өнер көрсетеді.
Концертте «Аққу», «Сағындым ғой», «Қарлығашым», «Ақ құсым», «Қайран менің жүрегім», «Өз елім», «Құстар әні» сынды шығармалар орындалады. Бағдарлама «Махамбет» классикалық күйімен аяқталады.
Концерт Қ. С. Станиславский атындағы орыс драма театрының сахнасында 8 сәуір күні сағат 18:30 өтеді.
Нұрғиса Тілендиевтің 100 жылдығын мерекелеу бүкіл ел бойынша өтіп жатыр. Барлық өңірлерде ұлы музыканттың өмірі мен шығармашылығына арналған концерттер, көрмелер, конкурстар мен фестивальдер жоспарланған. Сондай-ақ, шетелде де түрлі шаралар өтеді. Қазақстанның Франциядағы мәдениет күндері аясында ЮНЕСКО штаб-пәтерінде композитордың мерейтойына арналған концерт жоспарланған. АҚШ-тың Карнеги-холлында композиторға арналған концерт пен көрме күтілуде, ал Бейжіңде көрермендер оның шығармаларын «Құстар қайтып барады» концертінде тыңдай алады.
